الأوله حتى يقع الغرام ...............القرايا

الله يخرب بيت الثقافه على اللي جابوا الثقافه كان لازم يعني ابقى مثقفه؟؟؟؟ حتى أمي عايزه تسرب كتبي زي القطط و تبيعهم لبتاع الروبابكيا بالكيلو و دايما تقعد تقولي لو حتدوري على عريس من بتوع الثقافه يبقى ناويه على قعادك جمبي، عارفه يختي من غير ما تقولي، بس هيه بأه حلاوة روح

كل ما يجيلي عريس أقعد ألف و أدور علشان أعرف بيقرا ولا لأ و طبعا أما بحس إنو مفهمش أنا عايزه إيه بالضبط بجيب من أبو أخير.....حضرتك بتقرا؟؟؟ يرد بكل بساطه لأ.....لأ؟؟ كاك قوى، وكاك خابط في نفوخك بردو. طب بتقرا الجرنال؟ ده على فكره أضعف الإيمان.....لأ.....طب مجله الكواكب؟ مجله السيارات؟؟ رجل مستحيل؟؟ طب بلاش أكيد مغامرات هاري بوتر؟؟ فيقولي على طريقه روبي لأ لأ لأ لأ.......لااااااااا ده انت بأه جاي تغظزني مش كده؟
طب أما هو كده سيبك من أنا حأعمل بيك إيه......إنت حتعمل بيا إيه أساسا، يا حبيبي أنا منفعكش بنص فرنك.....أنا أساسا مش حعشش في نغاشيشك......طريقة كلامي العادي مش حتدخل ذمتك ببصله. هو صحيح أنا في كلامي العادي مش بستخدم ألفاظ زي اللانهائيه و الأيدولوجيه الفكريه و لكن وارد جدا أن أتحدث عن أناس لا تعرفهم.....كأن أقول لك ألبير كامي، تفتكر إنو أخو حسن كامي التوم، أو أن أحدثك عن مسرحيه لسعدالله ونوس، فتفتكر سعدالله ده اسم واحد قراداتي في سيرك أو أقولك ابراهيم أصلان تقولي مش ده بردو فاتح محل طرابيش في الحسين ، طب غسان كنفاني؟؟؟؟ مين ده؟ واحد بيعمل كنافه؟؟؟
و ممكن تستفزني الى ما هو أبعد من ذلك......إنك تطلع تعرف الناس لكن تقولي كلام يحرق دمي، كأن أقول لك د.نوال السعداوي كان لها تأثير كبير على تفكيري و بشكل أو بأخر ساهمت في تشكيل وجداني، بتقولي مين؟! قولي تاني كده......نوال السعداوي؟؟؟ الوليه المنكوشه اللي ناكشه شعرها على طول دي و بتتكلم على طول في الجنس؟؟ بتقري لدي؟ دي ست سافله، وعينها تدب فيها رصاصة و عايزه تتشنق في ميدان عام دي ملحده كمان ! كمان؟!!!!!! لا أنا معرفهاش دي هيه اللي بتجري ورايا و بتعاكسني على الموبايل في
نصاص الليالي و بتتحايل عليا عشان اقرا كتبها و أنا اللي بترفع.طبعا الحاجات اللي بحكيها حصلت بجد و أنا زهقت و جبت أخري كل واحد جاي عايز يتجوز ست أبوها عشان يخليها ست الدار و انا مكنتش اصلا ست ابوها عشان ابقى ست الدار فقررت إني أدور على عريس مدوُن أكيد حيبقى عنده حد أدنى من الثقافه بدل حرقه الدم اللي بشوفها(تلك دعابه ).......وزي ما عمنا نجيب سرور بيقول "منين أجيب ناس" أنا بقول منين أجيب عريس على مزاجي.......يا خلق هووووو عايزه اتجوز واحد الأوله فيه بيقراااااااااااااااااااااا