Sunday, October 21, 2007

تهريج رأي عام


لا أستطيع أن انكر أهمية الموضوع الذي ناقشه مسلسل يسرا هذا العام. فجريمة الإغتصاب فعلا من الجرائم البشعة و الأبشع هي كيفية تعاملنا معها في مجتمعنا الشرقي من حيث السكوت و التعتيم و النظرة للضحية على انها أمراة ساقطة. ارفع القبعة ليسرا و لطاقم العمل على اختيار هذا الموضوع الغير تقليدي بعيدا عن فساد رجال الأعمال و طغيان معلم الحارة أو العمدة و بعيدا عن أدوار السوبر ومن و السوبر من التي اعتدنا عليها من نور الشريف و يحي الفخراني.............و لكن لي بعض الملاحظات على هذا المسلسل


أولا: المفروض ان يسرا إمراة تعرضت للإغتصاب، وبيتها اتخرب ورفدوها من الكليه و عيالها اتشردوا و بنتها حاولت الإنتحار منين يجيلها نفس تلبس اللبس ده و حاطه ميك أب كإنوا عند بيوتي صالون و مانيكير أحمر لامع فاقع طول المسلسل؟ ده تاني يوم الحادثه كانت شالت المانيكير الأحمر الداكن و حتط بدالوا أحمر فاقع طب حتي حطي مانيكير اسود حدادا على مصيبتك السودة!! في واحدة حصلها كدة يا ناس يبقى ليها نفس و لا مزاج كده زي مزاج الست يسرا العالي؟؟ إلا لازم تبقى قمرين في المسلسل مش قمر واحد و تندعق الدكتورة عبله بأم مشكلتها المهم يسرا تبقى حلوة و شيك



ُثانيا: الداااكتورة السنيورة حنان الشهيرة بلقاء الخميسي المفروض انها دكتورة، و من الصعيد و ابوها معلم من معلمين روض الفرج واخوها المعلم ابراهيم الحمٌش، طبيعي واحدة بالظروف دي وششششششش تبقى محجبه ملهاش حل تاني، روح انت كلية الطب و اتحداك لو لقيت 20 بنت مش محجبه، نووووووو واي يا مان اللهم إلا اذا كانت مسيحيه. ده انا بتكلم عن طب القاهرة و عين شمس ما بالك طب سوهاج و لا أسيوط؟؟ فدا طبعا عمللي أنا شخصيا فصل و عدم تصديق خصوصا بالعدسات الخضرة اللي لبستها طول المسلسل واللي عايزة تقنعنا انها عينيها على اساس ان احنا من كفر العمى ولو هي مش عايزة تقنعنا على اساس ان احنا فاهمين كل حاجه يبقى بتتأنتك بيهم ليه بظروفها المنيلة دي و تقعد تعيط بيهم و تبح في صوتها



ثالثا: فين أم كلية الطب دي الي الطلبة فيها بيخرجوا يهتفوا للأساتذة أنا كنت أصدق انهم يحدفوهم بالطماطم أو زجاجات المياة المعدنية الفارغة لكن يطلعوا يهتفولهم؟؟؟ بلا نيلة ما احنا كنا في كلية طب بردوا و لا أساسا نعرف مين الداكترة اللي بيدرسولنا و لا بنشوفهم أخرنا نسمع عنهم كده زي ما بنسمع عن العفاريت و الأشباح. ولا في أي برسونال كونتكت من أساسوا حد اصلا يستجري يهوب من ناحية مكتب الدكتور؟ تقولي نهتف ليسرا؟؟؟؟


رابعا: هو المسلسل ده قصتوا و أحداثوا كانوا في مصر المحروسة؟؟ و لا في قاهرة المعز؟ عشان لو كانت احداثوا في كوالالامبور اصدق ان الوزير شرحبيل جلال قصدي شكري باشا بيه سيدي جلال ميعرفش يطرمخ عل الموضوع و يطلع ابنوا منها مع انو من الجامدين قوي قوي في الحزب و كان مرشح يمسك رئاسة الوزاراء قال ايه في الأخر امل حياته و روحه و فشته و رقبته في ايد المتر مرسي و قال وزير العدل مبيردش عليه ووزير الداخليه منفضله و النائب العام يديلوا الطرشه........مش قلتلقوا دي احداث في كوالالامبور على اساس ان المخرج سوري بقى و كده


خامسا: نفسي مكنش بحلم و يكون بجد في كل اربع إقسام في مصر ظابط واحد فقططططططط زي سامي العدل...........يا سلام ابوسك يا سامي فينك من زمان بس لو تطلع من المسلسل تبقى فل جنان بالألوان