Friday, October 26, 2007

حوار عاطفي ثانوي تعبان جدا مهٌيس

شخصيات و أحداث هذا الحوار من خيال المؤلفة و أي تشابه بينهم و بين أحداث و شخصيات حقيقية هو تشابه من قبيل الصدفه البحته



المشهد الأول


في احدى الكافيهات

ليل\داخلي



راسم: على فكرة إنتي مختلفة عن أي بنت قابلتاها
فلة: إشمعنى يعني؟
راسم: مودك كده غريب و مختلف،المزيكا اللي بتحبي تسمعيها الكلام اللي بتكتبيه حتى عزفك على البيانو مختلف دماغك دي فيها حاجات غريبة عكس البنات اللي بيفكروا نخرج فين و مين ساب صاحبته و نلبس ايه النهاردة

فلة: على فكرة اللي بيعزفوا و بيكتبوا كويس كتير و في ناس أحسن مني ميت مرة.......و بعدين أنا بردو زي البنات دول، بفُكر هالبس ايه و اخرج فين و بنم في التليفون بالساعات على مين ساب صاحبته.......الحاجات دي مش مقياس يعني للدماغ الفاضيه

راسم: يعني عايزة تقنعيني انك في الأخر بنت عاديه؟
فلة: مش عارفة يمكن أكون مش عاديه عند ناس.......وعاديه عند ناس تانيه، حسب بأه تفسير كل واحد لكلمة عادي

راسم: انت حبيتي قبل كده؟
فلة : ليه السؤال ده؟

راسم: إجابته تهمني

فلة: إشمعنى؟

راسم: هو أنا كل ما أسألك عن حاجه تقوليلي إشمعنى؟

فلة: بص،ممكن اعجاب كده من بعيد لبعيد بس حب حقيقي لأُ، و معتقدش اني ممكن أحب حب حقيقي

راسم: إشمعنى بأه؟؟
فلة:هىءهىءهىءهىء......انت دلوقتي اللي بتقولي إشمعنى.......عارف ليه بأه لأن عقلي مش مطمٌن
راسم:إزاي يعني؟؟
فلة: إفرض حبيت تقدر تتضمنلي إن الطرف التاني ميضحكش عليا و معندوش ازدواجيه، يعني بيقولي بحبك و هو مش ملقلق من جوه ، دا إذا كان بيحبني أصلا و إن كان بيحبني فعلا بجد حأقدر كده بكل بساطه أروح أقول لأهلي أنا بحب واحد و بخرج معاه و بكلموا في الموبايل بالساعات كل يوم؟ ساعتها أقل حاجه حتتقال طالما كده يجي يخطبك.....طب يا ترى هو أصلا جاهز للخطوة دي ماديا و نفسيا ولا حيقولي لسه ظروفي؟ طب هو كان من أساسو بيفكر فيا كزوجه ولأ حب و خلاص؟
راسم:ممممم
فلة: سكت ليه؟
راسم: مش عارف أقولك ايه بس انت مكبرة الموضوع زيادة عن اللزوم و الموضوع ممكن يتاخد ببساطه عن كده
فلة: يمكن بس أنا معنديش روح المغامرة دي إني أجرب حاجه عارفه ان أهلي مش موافقين عليها و المجتمع بيتظاهر إنو موافق عليها والشخص اللي بحبه إحتمال بردو إنو من جواه مش موافق عليها
راسم: أفهم من كده إن ملكيش تجارب عاطفيه خااااالص؟؟
فله: أيوه، بس ده مش من باب الأدب، نظام البنت القطه المغمضه اللي بتسمع كلام بابا و ماما و عايشه الدور......ده من باب عدم الإقتناع
راسم: دا انتي مش بس فنانة......دا انتي فيلسوفة......يمكن اكتر حاجه بتعجبني فيكي انك بتستمدي قوتك من أفكارك علي فكرة صدقيني أنا بردو مش زي أي حد عرفيتيه ولا أنا بفكُر زي الناس دي
فلة: دا أكيد وإلا مكنتش قبلت أخرج معاك رغم ان احنا لا زمايل ولا حاجه
راسم: و عرفتي منين إن أنا مش بفكُر زي الناس دي؟
فلة: خبرتي و تجاربي
راسم: مش بتقولي إن ملكيش تجارب عاطفيه؟
فلة:هي التجارب عاطفيه و بس؟ التجارب الإنسانيه متنفعش؟ و بعدين أنا اتعودت أتعلم من تجارب الناس التانيه، دا غير إن ليا نظرة في الناس
راسم:مش قلتلك انك بنت مش عاديه؟؟؟؟؟
المشهد الثاني
صخرة على الشط
نهار\ خارجي
راسم: عارفه؟؟
فلة: ايه؟
راسم: أنا حاسس انك قريبه مني قوي
فلة : إشمعنى؟
راسم: يااااااااااااااااادي إشمعنى اللي انت مسكاهالي من ساعة ما عرفتك
فلة: هىءهىءهىء
راسم: انت رقيقة قوي
فلة: مقولتليش بأه انت ليه حاسس اني قريبه منك؟
راسم: ساعات أما بتكلم مع حد و نسكت فجأة ، بحس إن في حاجه غلط، حصل فراغ ما بينا......لازم نسده، بضطر أقول أي كلام عشان حاسس ان سكوتنا ده مش مريح......لكن أما يكون حد قرٌيب مني...ممكن أقعد معاه ساعات و محدش فينا يقول بم، بس حاسس ان إحنا أكننا بنتكلم من غير ما نتكلم...فاهمه حاجه؟
فلة: هىءهىءهىء....ايه الكلام الكبير ده؟
راسم: دا احنا نقطه في بحرك يا فندم........انتي بتبصيلي كده ليه؟
فلة: مش عارفة يمكن مبسوطه بصداقتك
راسم: بجد؟
فلة: جدا بستريحلك قوي في الكلام
راسم: طب جميييييييييل، بقولك ايه.....ما تيجي ندخل سينما
فلة: سينما......مممممم
راسم: أه ، ايه المشاكل
فلة: اه ام ام
راسم: ايه مالك ؟ متردده؟؟ على فكرة أنا اللي عازم
فلة: لأ مش المسأله
راسم: مش بتقولي إن إحنا صحاب و انك بتستريحلي دا غير ان احنا بقينا قريبيين من بعض؟
فلة: أيوا ....بس
راسم: يالا بأه في فيلم جامد قوي و نفسي أدخله معاكي
فلة: طيب خلاص أوكيه

المشهد الثالث

قهوة بلدي

ليل\خارجي

راسم: على فكرة أنا اتخنقت من فلة الفولالي دي و خلاص كده جابت أخرها معايا

صٌديق: ليه بس يا عم؟؟

راسم: أصل عرفتلك حته في تانيه حقوق انما جامده يا مان لا شيل ايدك ولا الوقت إتأخر ولا توجع دماغك بكلام و لوك لوك لوك لوك بيني و بينك في الأول بيبقى الكلام لذيذ حاجه جديده و مختلفه و بعد كام قعده كده خلاص بتكون جبت أخرها و عرفت الحوار كله خلاص مفيش كلام جديد يبتقال و الواحد بأه عايز فعل و فلة دي أخرها كلام و عايشالي دور إن إحنا صحاب بنخرج مع بعض نتغدى و نتعشى و ندخل سينما و كل يوم نتكلم ساعتين في التليفون و تقولي صحاب

صٌديق: دي صوحبيه من بتاعتنا بس هيه عايزة تسميها صحاب عادي، لحفظ ماء الوجه.... يعني الإسم هيفرق ايه؟

راسم: بصراحه أنا كنت فاكر نفسي بحبها......بس إكتشفت إن هي كانت شداني ليها عشان مختلفة و صعبه،، جننتني عشان أعرف أخرج معاها و قعدت كيتير أزن عشان ندخل سينما بس بعد ما خرجنا و اتكلمنا حسيت إني زهقت و مفيش جديد عندها مش حاسس إنها كانت صعبه زي ما كنت فاكر الزهوه بتاعت الأول راحت و الحاجات اللي كانت بتقول مش هتعملها عملتها على أساس ان احنا صحاب,,,,تعرف؟ في الأول أما كانت شداني مكنتش بشوف فيها حاجه وحشه بعد كده بقيت مشوفش فيها حاجه زياده عارف أما خلاص تتعود على الحاجه؟؟؟ بس يا عم و دا اخرها ممكن أزن كمان و أخد اللي أنا عايزه بس كفايه كده بردوا الواحد عنده ضمير

صٌديق: طيب يا أخويا

7 comments:

Anonymous said...

على فكرة يا ميرز أنا عارفة انتي قصدك علي ايه و مين


ريم

الحمقاء المضلله innominate x said...

ريم ركزي شويه أنا أول حاجه قولتها أن اي تشابه بين الشخصيات و الأحداث من قبيل الصدفه هىءهىء هىء

ربيع said...

هيهيهيهيهيهيهيهيهيهيهي
هوهوهوهوهوهوهوهوهوهوهوه
هاهاهاهاهاهاهاهاهاهاهاهاه

osama said...

المشاعر في كفة... والجسد في كفة
فإن غلبت الأولى الثانية كان الحب روحا خالصة.. وان غلبت الثانيه كان الامر شهوه.. وان حدث تداخل لا قبل لمعرفة الأرجح كان الأمر مزيج والزواج هو العلاج...

ومع ذلك هناك في موضوعك كان الامر بالنسبه له اكتشاف وجسد...

دمت بكل ود...
خالص تحياتي

hurricane_x said...

طبعاً الكلام ده مبيحصلش فى الحقيقة زى ماكلنا عارفين

حائر في دنيا الله said...

الصدفة دي انا شفتها قبل كدا
فين ياربي
فين ياربي

مش مشكلة فين، المشكلة ان الخط صغير ومرهق شوية
:)

لك تحياتي
السلام عليكم

البنت الشلبية said...

فعلا هوا ده تفكير الشباب اليومين دول
ربنا يبعدهم عنى ويحفظ بنات المسلمين